Mantolen Cyfrifon Cryno - Cymorth
Darperir y canllawiau hyn i’ch helpu chi i gwblhau’r cyfrifon cryno i’w ffeilio gyda Thŷ’r Cwmnïau. Os oes angen cyngor technegol pellach arnoch mewn perthynas â chynnwys y cyfrifon, yna bydd angen i chi geisio cyngor annibynnol. Cofrestrfa yw Tŷ’r Cwmnïau ac ni all ddarparu cyngor proffesiynol ar faterion cyfrifeg.
- Cyffredinol
- Daw cyfrifon cryno o gyfrifon cyflawn neu gyfrifon syml.
- Y datganiadau ar y fantolen
- Rhaid derbyn pob un o’r pedwar datganiad cyn cyflwyno’r cyfrifon i Dŷ’r Cwmnïau.
- Dyddiad y cyfarwyddwr sy’n cymeradwyo’r cyfrifon
- Rhaid i hyn fod ar ddyddiad y fantolen neu’n ddiweddarach, a rhaid iddo beidio â bod yn ddyddiad yn y dyfodol (dim ond dyddiadau o fewn y cyfnod hwn a fydd yn ymddangos ar y calendr).
- Y cyfarwyddwr sy’n cymeradwyo’r cyfrifon
- Rhaid nodi enw’r cyfarwyddwr a lofnododd gyfrifon statudol y cwmni ar ran bwrdd y cyfarwyddwyr.
- Cyfarwyddwr ychwanegol sy’n cymeradwyo’r cyfrifon (os yw’n berthnasol)
- Gellir nodi enw mwy nag un cyfarwyddwr os oes angen.
- Ffigurau cymharol
- Rhaid darparu ffigurau cymharol oni bai nad oes unrhyw gyfnod cyfrifeg blaenorol.
- Dyddiad y fantolen
- Rhaid i hyn fod o fewn 7 diwrnod i’r dyddiad cyfeirnod cyfrifeg (dim ond dyddiadau o fewn y cyfnod hwn fydd yn ymddangos ar y rhestr o ddyddiadau). Fel arall, rhaid ffeilio AA01c i newid dyddiad cyfeirnod cyfrifeg y cwmni.
- Arian treigl
- Rhaid defnyddio’r un arian treigl trwy’r cyfrifon i gyd.
- Cyfalaf cyfrannau a erchwyd ond na dalwyd
- Swm a gafodd ei erchi wrth glustnodi’r cyfrannau, ond nad oedd wedi dod i law ar ddyddiad y fantolen yw hwn.
- Asedau Sefydlog
- Eitemau sydd wedi cael eu caffael gan y busnes sydd â gwerth i’r busnes ac oes economaidd sy’n hwy na’r cyfnod cyfrifeg y cyflwynir y cyfrifon mewn perthynas ag ef (ceir esboniad o asedau diriaethol ac anniriaethol isod).
- Asedau anniriaethol
- Adnoddau tymor hir heb bresenoldeb ffisegol e.e. brand, enw da, ewyllys da, perthnasau â chyflenwyr. Nid yw hyn yn cynnwys arian parod neu eitemau a ddelir i’w trosi’n arian parod.
Os nodir bod asedau anniriaethol, rhaid darparu nodyn sy’n manylu ar y gost ar ddechrau’r cyfnod cyfrifeg, ynghyd ag unrhyw ddibrisiant yn ystod y cyfnod o dan sylw. - Asedau diriaethol
- Adnoddau tymor hir â phresenoldeb ffisegol e.e. cerbyd cwmni, eiddo, peiriannau ac offer. Nid yw hyn yn cynnwys arian parod neu eitemau a ddelir i’w trosi’n arian parod.
Os nodir bod asedau diriaethol, rhaid darparu nodyn sy’n manylu ar y gost ar ddechrau’r cyfnod cyfrifeg, ynghyd ag unrhyw ddibrisiant yn ystod y cyfnod o dan sylw. - Buddsoddiadau
- Adnoddau y mae’r cwmni’n eu dal at ddibenion buddsoddi yn hytrach na masnachu e.e. eiddo, cyfrannau.
Os nodir bod buddsoddiadau sefydlog, rhaid darparu nodyn sy’n manylu ar y gost ar ddechrau’r cyfnod cyfrifeg, ynghyd ag unrhyw ddibrisiant yn ystod y cyfnod o dan sylw. - Cyfanswm yr asedau sefydlog
- Cyfanswm gwerthoedd llyfr net yr asedau anniriaethol, yr asedau diriaethol a buddsoddiadau ar asedau sefydlog.
- Asedau cyfredol
- Arian parod neu adnoddau a ddelir at ddibenion eu trosi’n arian parod. Mae hyn yn cynnwys stoc, dyledwyr a buddsoddiadau.
- Stoc
- Nwyddau a brynwyd neu a wnaed i’w hadwerthu, ond sydd heb gael eu gwerthu ar ddyddiad y fantolen.
- Dyledwyr
- Dyma’r symiau sy’n ddyledus i’r busnes yn sgil gweithgarwch masnachu.
Rhaid darparu nodyn os yw eich dyledwyr yn cynnwys unrhyw symiau sy’n ddyledus i’r busnes mwy na blwyddyn ar ôl dyddiad y fantolen. - Buddsoddiadau
- Adnodd y mae’r cwmni’n ei ddal at ddibenion buddsoddi yn hytrach na masnachu, ac sy’n debygol o gael ei werthu cyn bo hir.
- Arian yn y banc ac mewn llaw
- Gwerth llyfr yr arian mewn llaw (h.y. arian papur a darnau arian) ac unrhyw falans positif mewn cyfrif cyfredol ar ddyddiad y fantolen.
- Rhagdaliadau ac incwm a gronnwyd
- Rhagdaliadau a gwerthiannau nad yw’r cwmni wedi eu cofnodi yn ei lyfrau hyd yn hyn.
- Credydwyr: symiau sy’n ddyledus cyn pen un flwyddyn
- Symiau sy’n ddyledus gan y busnes ar hyn o bryd ac sy’n daladwy yn y tymor byr h.y. ar unrhyw adeg hyd at flwyddyn ar ôl dyddiad y fantolen.
Os yw’r rhain yn cynnwys unrhyw ddyledion sydd wedi eu sicrhau (e.e. gorddrafft wedi ei sicrhau gyda’r banc y mae’n rhaid ai ad-dalu ar gais, rhandaliadau sy’n daladwy ar fenthyciadau wedi eu sicrhau cyn pen blwyddyn ar ôl dyddiad y fantolen ac ati), rhaid eu datgelu yn nodyn y credydwyr sy’n cyd-fynd â’r cyfrifon. Mae hi’n dderbyniol dangos cyfanswm y dyledion tymor byr a thymor hir sydd wedi eu sicrhau mewn un ffigur yn nodyn y credydwyr. - Asedau cyfredol net (rhwymedigaethau)
- Cyfanswm yr asedau cyfredol llai’r rhagdaliadau a’r incwm a gronnwyd, a’r credydwyr: symiau sy’n ddyledus cyn pen un flwyddyn.
- Credydwyr: symiau sy’n ddyledus cyn pen mwy nag un flwyddyn
- Symiau sy’n ddyledus gan y busnes a fydd yn daladwy neu’n ad-daladwy dros gyfnod hwy h.y. mwy nag un flwyddyn ar ôl dyddiad y fantolen.
Os yw’r rhain yn cynnwys unrhyw ddyledion wedi eu sicrhau (e.e. rhandaliadau sy’n daladwy ar fenthyciadau mwy nag un flwyddyn ar ôl dyddiad y fantolen), rhaid eu datgelu yn nodyn y credydwyr sy’n cyd-fynd â’r cyfrifon. Mae’n dderbyniol dangos cyfanswm y dyledion tymor byr a thymor hir sydd wedi eu sicrhau fel un cyfanswm yn nodyn y credydwyr.
Os yw’r rhain yn cynnwys unrhyw fenthyciadau neu ddyledion sy’n daladwy gan y busnes mewn rhandaliadau neu fel arall mwy na 5 mlynedd ar ôl dyddiad y fantolen, rhaid eu datgelu ar wahân ar ffurf a) rhandaliadau ar ddyledion ar ôl 5 mlynedd a b) dyledion heb randaliadau ar ôl 5 mlynedd yn nodyn y credydwyr sy’n cyd-fynd â’r cyfrifon. - Darpariaeth ar gyfer rhwymedigaethau
- Y ddarpariaeth ar gyfer taliadau yn y dyfodol, y mae eu gwerth a’u hamseriad yn ansicr.
- Croniadau ac incwm gohiriedig
- Incwm a gafwyd mewn perthynas â chyfnod cyfrifeg yn y dyfodol.
- Cyfanswm yr asedau net (rhwymedigaethau)
- Cyfanswm yr asedau llai cyfanswm y rhwymedigaethau.
- Cyfalaf cyfrannau a erchwyd
- Y cyfrannau y mae’r cwmni wedi gofyn am daliad llawn neu rannol mewn perthynas â nhw ac wedi derbyn y taliad hwnnw. Os oes mwy nag un dosbarth o gyfrannau, rhaid darparu nodyn sy’n manylu ar nifer a gwerth cyfanred enwol pob dosbarth o gyfrannau.
Os yw’r cyfrannau wedi cael eu clustnodi yn ystod y flwyddyn, rhaid darparu nodyn sy’n nodi manylion y cyfrannau (gan gynnwys y dosbarth o gyfrannau, eu gwerth cyfanred a’u nifer). - Cyfrif premiwm cyfrannau
- Y gwahaniaeth rhwng gwerth enwol y cyfrannau a’u gwerth pan gawsant eu dosbarthu gan y cwmni.
- Cronfa adbrisio
- Cyfanswm y newid yng ngwerthoedd yr asedau yn sgil yr adbrisiad.
- Cronfeydd eraill
- Gwerth unrhyw gronfeydd na chafodd eu datgan fel arall h.y. y rhai a neilltuwyd i dalu costau mawr neu annisgwyl.
- Cronfeydd cyfranddeiliaid
- Cyfanswm buddsoddiad y cyfranddeiliaid mewn cwmni naill ai’n uniongyrchol (trwy gyfalaf cyfrannau a ddosbarthwyd) neu’n anuniongyrchol (trwy alluogi i rai o’r elw cadwedig gael ei ail-fuddsoddi).
- Nodyn ar Bolisïau Cyfrifeg
- Nodyn gorfodol yw hwn, a dylai ddarparu manylion yr holl brif bolisïau cyfrifeg y mae’r cwmni’n eu dilyn wrth baratoi cyfrifon statudol. Lle mae’r cwmni wedi mabwysiadu’r Safon Adrodd Ariannol ar gyfer Endidau Llai (FRSSE) dylai’r polisïau cyfrifeg gynnwys datganiad bod y cyfrifon wedi cael eu cynhyrchu yn unol â’r FRSSE sy’n nodi’r dyddiad effeithiol.
- Trafodion i gyd-fynd â nodyn y Cyfarwyddwyr
I bob cyfarwyddwr, gellir cynnwys gwybodaeth am flaensymiau neu gredydau y mae’r cwmni wedi eu rhoi, neu unrhyw warantau o unrhyw fath a gychwynnodd y cwmni ar ran y cyfarwyddwr.
Am bob blaenswm neu gredyd, datgelwch y swm, y gyfradd llog, y prif delerau a’r symiau a ad-dalwyd. Am bob gwarant, datgelwch y prif delerau, y rhwymedigaethau mwyaf y gall y cwmni eu tynnu ac unrhyw swm a dalwyd, ac unrhyw rwymedigaeth a dynnwyd gan y cwmni at ddibenion cyflawni’r warant (gan gynnwys unrhyw golledion a godwyd wrth ei gweithredu.
Rhaid datgelu’r cyfansymiau canlynol hefyd: y blaensymiau neu’r credydau, y symiau a ad-dalwyd, symiau’r rhwymedigaeth uchaf o dan warant, ac unrhyw symiau a dalwyd neu rwymedigaethau a dynnwyd o dan y cytundebau gwarant.
Dim ond mewn cyfrifon statudol y mae’r nodyn hwn yn orfodol.
- Cwmnïau wedi eu cyfyngu trwy warant
- Nid yw’r cwmnïau hyn wedi eu cyfyngu trwy gyfrannau felly darperir nodyn sampl, sy’n cynnwys testun enghreifftiol. Gellir golygu’r nodyn hwn i gynnwys swm y warant neu unrhyw wybodaeth arall sy’n berthnasol i’r cwmni.
- Cadw a gadael
- Mae hyn yn gadael i chi gadw’r manylion a nodwyd ac ailgydio yn y gwaith ar y cyfrifon a’u cyflwyno’n ddiweddarach.
- Gwaredu a gadael
- Mae hyn yn gadael i chi gael gwared ar unrhyw fanylion a nodwyd a gadael y ffurflen.
- Cadw copi
- Mae hyn yn gadael i chi gadw copi o’r cyfrifon ar eich cyfrifiadur.
- Dilysu a pharhau
- Mae hyn yn cyflawni archwiliadau sylfaenol ar y wybodaeth yn y cyfrifon a gyflwynwyd. Os nad oes angen unrhyw newidiadau pellach, fe welwch sgrin sy’n crynhoi sut bydd y cyfrifon a gedwir ar y Gofrestr yn edrych. Cofiwch wirio’r crynodeb hwn am fod yn rhaid iddo gyd-fynd â’r copi rydych chi wedi ei lofnodi. Os ydych chi’n fodlon, cyflwynwch y cyfrifon trwy ddewis ‘Cyflwyno’r cyfrifon’.